Дулаан шийдэл

“Дулаан шийдэл” төслийн нэг зорилго нь барилгын салбарын бичил, жижиг, дунд бизнес эрхлэгчдийг чадавхжуулах, ажилд зуучлах юм. Энэ ч үүднээс барилгын ажлын тодорхой туршлагатай, биеэ дааж бизнес эрхлэх, дөнгөж эхэлж буй бизнесээ хөл дээрээ босгох зорилготой иргэн, бригадыг бүртгэж, дулаалгын технологид сурган, бусад чадавхжуулах сургалтад хамруулсан. Улмаар байшингийн дулаан алдагдлыг хэмжих, дулаалгын ажилд зуучиллаа. Тэдний дунд эмэгтэйчүүд ч багтаж, айл өрхөд эрчим хүчний хэмнэлттэй шийдлүүдийг санал болгож, дулаалгын ажлуудыг ахлан, гардан гүйцэтгэж байна. Ингэснээр агаарын бохирдлыг бууруулахад өөрийн хувь нэмрээ оруулахын зэрэгцээ орлогын нэмэлт эх үүсвэртэй болж, амжилттай ажилласаар байна. 

Нэр: Л.Цэеэрэгзэн 

Мэргэжил: Халаалт, агаар сэлгэлтийн инженер

Барилгын салбарт ажилласан туршлага: 18 жил 

Төсөлтэй хамтарч ажиллаж эхэлсэн хугацаа: 2021 оны 06 сар

Би иргэдийн тав тухтай амьдралын төлөө ажиллаж байгаадаа туйлаас баярлаж явдаг. Ингээд “Дулаан шийдэл” төслийнхөө сургалтуудад хамрагдаж, дулаалгыг технологийн дагуу хэрхэн зөв, оновчтой хийх, байшингийн дулаан алдагдлыг камераар хэмжих гэх мэт олон зүйлийг сурч авлаа. Сурч мэдсэндээ тулгуурлан байшингийн дээвэр, хана, цонхны дулаалга хийж байна. Одоо хэрэглэгчид маань дулаан, тохилог орчинд амьдрах болсондоо таатай байдаг болсон. Тиймээс барилгын салбарт ажиллаж буй эмэгтэйчүүд энэ төсөлд хамрагдаж, дулаалгын зөвлөхөөр ажиллах бүрэн боломжтой юм.

Нэр: Д.Нямгэрэл

Мэргэжил: Газрын тосны инженер

Барилгын салбарт ажилласан туршлага: 4 жил

Төсөлтэй хамтарч ажиллаж эхэлсэн хугацаа: 2021 оны 11 сар

Шинэ зүйлд өөрийгөө сорих, хөгжих зорилгоор төсөлд хамрагдсан. Шинэ хамт олонтой болж, бусдаасаа суралцан, туршлага солилцож байна. Байшингийн дулаан алдагдлыг хэмжиж, үнэлгээ гаргаж явахдаа "хүмүүс яавал дулаан өвөлжих вэ” гэдэгт санаа зовниж байдагтай нүүр тулсан. Ингээд мэргэжлийн байгууллагын зөвлөсөн, эрчим хүчний хэмнэлттэй технологиор байшинг нь дулаалж өгснөөр айл өрх ч сэтгэл хангалуун, би ч өөртөө улам итгэлтэй болж байна. 

Нэр: М.Анхмаа

Мэргэжил: Сантехникийн инженер

Барилгын салбарт ажилласан туршлага: 14 жил

Төсөлтэй хамтарч ажиллаж эхэлсэн хугацаа: 2019 он

Төсөлд хамрагдсанаараа бизнесийн үйл ажиллагаагаа хэрхэн өргөжүүлэх талаар их зүйлийг сурч, өөрийгөө хөгжүүлсэн. Бригадын ахлагчийн хувьд багаа хэрхэн зөв зохион байгуулж, эрчим хүчний хэмнэлттэй дулаалгын шийдлүүдийг яаж хэрэгжүүлэх талаар суралцсаар байна.