Барилгын дулаан хамгаалалтын шинэчлэгдсэн норм, дүрмийг Монголын барилгын инженерүүдийн холбооны ажлын хэсэг, ШУТИС ийн Барилгын эрчим хүчний хэмнэлтийн төвийн захирал Б.Мөнхбаяраар ахлуулан боловсруулсан бөгөөд 2020 оны 8 сарын 13-ны өдрийн Барилга Хот Байгуулалтын Яамны сайдын 146 тоот тушаалаар батлалаа. Дүрэм БНбД  25-01-20 Барилгын дулаан хамгаалалт нэртэйгээр 2021 оны 1 сарын 1-нээс хүчин төгөлдөр болно. Европын Холбооны Свич Эшиа хөтөлбөрийн  санхүүжилттэй Францийн Жэрэс ОУТББ-ын удирдан хэрэгжүүлдэг “Дулаан шийдэл” төслийн барилгын эрчим хүчний хэрэгцээний тооцоолол, хяналтын маягт хамтдаа одоо ийнхүү эрх зүйн баримтад тусгагдаж Барилгын дулаан хамгаалалтын шинэчлэгдсэн нормд багтлаа.

Энэхүү нормын нэг онцлог нь барилгын эрчим хүчний хэрэгцээний тооцооллын аргачлал, барилгын эрчим хүчний гэрчилгээ зэргийг боловсруулахад Европын холбоонд мөрдөгдөж ашиглагдаж буй стандартууд, техникийн бичиг баримтуудыг ашигласан бөгөөд ингэснээрээ арга аргачлалын хувьд олон улсад нэг стандартаар ойлголцох боломжийг бүрдүүлсэн. Барилгын эрчим хүчний хэрэгцээний тооцоолол, гэрчилгээний хувилбар зэргийг Дулаан шийдэл төслийн хүрээнд 2019 оноос хувийн орон сууцны барилгуудад туршилтын журмаар ашиглаж эхэлсэн.  

“Дулаан шийдэл” төсөл агаарын бохирдол бууруулах зорилгоор Улаанбаатар хотын гэр хорооллын 1000 айлыг зөв дулаалах зорилготой. 1000 айл өрхийг зөв дулаалснаар түлшний хэрэглээг дор хаяж 30% багасгаж мөн төдий чинээ гарах утааг багасгах юм. Хувийн орон сууцныхаа дулаан алдагдлыг багасгах хүсэлтэй айлууд Хас банкны 8%-ийн хүүтэй 30 сарын хугацаатай ногоон зээлд хамрагдаж дулаалга хийлгэх боломжтой