Хувийн орон сууцны эрчим хүчний хэрэглээг бууруулах

Бидний хийсэн судалгаагаар Улаанбаатар хотын гэр хорооллын айл өрхүүд эрчим хүчний хэрэглээ өндөртэй, 90 гаруй хувийнх нь дулаан хамгаалалт стандарт шаардлага хангаагүй байдаг. Өвлийн хүйтэнд гэрээ халаах хэрэглээг бууруулах хамгийн зөв арга нь байшингаа зөв дулаалж алдагдлыг нь багасгах шаардлагатай. 

Хэрхэн төлөвлөж, ямар материалаар хэр чанартай барьсанаас хамаарч байшин бүрийн дулаан алдагдаж байгаа хэсгүүд ялгаатай байдаг.

Дээврийн дулаалга

Халуун агаар дээшээ хөөрдөг зарчмаар дулаан алдагдахыг багасгах хамгийн үр дүнтэй арга нь адрын хөндийг дулаалах юм.

Дээврийн хөндийг дулаалахын өмнө доорх зүйлсийг сайтар шалгана.

·         Модон дам нуруу эвдэрч хотойсон эсэх;

·         Дээврийн хөндийн дэвсгэр банз нь үжирч муудсан, дулаалгын материалыг даах эсэх;

·         Дээврийн материал муудсан, ус нэвтэрч байгаа эсэх;

Дээрх асуудлууд илэрсэн тохиолдолд мэргэжлийн хүнээс зөвлөгөө авч зассаныхаа дараа дулаалгын ажлыг хийж болно.

 Дээврийн хөндийг суллаж цэвэрлэсний дараа уур тусгаарлагчийг ул хэсэгт битүү дэвсэж өгнө. Энэ нь ахуйн хэрэглээнээс үүсч буй чийг, уур дээш гарч дулаалгыг норгохоос сэргийлнэ. 

Үүний дараа дулаалгын материалыг дэвсэж амыг нь зөрүүлэн давхарласаар хамгийн багадаа 20см зузаантай болгоод ханын босоо дулаалгатай уулзуулж битүүлнэ.

 Дулаалгын материал норсон тохиолдолд тусгаарлах чадвараа алддаг учраас дээврийн дусаалаас хамгаалж ус тусгаарлах амьсгалдаг хуудсаар сайтар битүүмжилнэ.  

Ханын агаар сэлгэлттэй дулаалга

 Тоосго, блокон байшинг хөөсөнцөр, эрдэс хөвөнгийн аль алинаар дулаалах боломжтой, харин модон барилгыг зөвхөн агаар нэвчдэг, хөвөн төрлийн материалаар дулаалдаг.

Эрдэс, чулуун,шилэн хөвөн эсвэл хонины ноос зэрэг хөвөн төрлийн дулаалгын материал ашиглах нь өөрийн давуу болон сул талтай юм. Суурилуулахад туслах  материал илүү орох боловч насжилт урттай.

Ханыг цэвэрлэж тэгшилгээ хийсний дараа брусээр босоо араг зангидаж суурь бэлтгээд дулаалга чигжиж үдэгчээр бэхлэнэ.

Брусээр хэвтээ,босоо араг зангидан дулаалгын материалаар дүүргэсэнээр дулаалгын гурван үе дуусч нийт зузаан нь 15см болно.

Үүний дээр ус тусгаарлах амьсгалдаг цаасыг амыг нь зөрүүлэн битүү үдэж бэхлэнэ. Амьсгалдаг цаас нь агаарыг чөлөөтэй нэвтрүүлж чийгийг хатаах зориулалттай.

Агаарын үеийн брус дээр гадна фасадны зориулалтай өнгөлгөөний хавтанг технологийн дагуу бэхлэнэ. Өнгөлгөө нь цементэн, хуванцар, модон, төмөр хавтан зэрэг байж болно.Хавтанг угсрахдаа ханын дээд болон доод хэсэгт  агаар сэлгэх нээлхий гаргана.

ХАНЫН ХОЛБОЛТТОЙ ДУЛААЛГА

Барилгын гадна ханаар ойролцоогоор дулааны 34% нь алдагддаг.

Дулаалгын материалын орцыг тооцохдоо цэвэр талбайг 10%-иар нэмж авна.

Ханын гадаргууг тэгшилснээр хөөсөнцөр хавтан наах зуурмагийн зардал багасна.

Дулаалгын хавтанг ам даруулж угсарнаар нэг цэг дээрх ачаалал багасна.

Булангийн хэсэгт хавтангуудыг шүдэлсэн холбоос үүсгэж наах нь илүү тогтвортой болгодог.

Хөөсөнцөрийг бэхэлсний дараа барилгын ирмэг хэсэгт зориулалтын булангийн тор хийж эвдрэл үүсэхээс сэргийлнэ. Булангийн торыг цавуут зуурмагаар наана.

Мөн хаалга цонхны эргэн тойронд нэмэлтээр давхарлаж тор хийснээр амлагаанууд нь тэгш болохоос гадна хагаралт, цууралт үүсэхээс сэргийлнэ.

Дулаалгын хавтанг үндсэн хананд хадаасаар бэхлээд тусгай цавууг түрхэдэг.

Тор нааж цавууг хатсаны дараа хөрсжүүлэгч хийнэ. Энэ нь чийгнээс хамгаалах болон дараагийн үе болох өнгө шавар, будгийн суурь үе болж өгдөг.

Хөрсжүүлэгч бэхжисэний дараа гадна хананд зориулалтын гоёлын шаврыг хийснээр барилгын гадна фасадад ирэхцохилт, даралтыг тэсвэрлэх чанар болон ус чийг тусгаарлах чанар нь нэмэгддэг.

СУУРИЙН ДУЛААЛГА

Хэрэв та байшингийнхаа гадна ханыг дулаалахаар шийдсэн бол суурийг хамтад нь дулаалах нь илүү үр дүнтэй байдаг. Дулаалаагүй суурь нь сайхан дахтай боловч зуны гуталтай өвөлжихтэй адил ойлголт юм.

Суурийн бетон хагарсан, бутарсан эсвэл гадаргуу нь өө сэвтэй бол нэмж элс цементэн зуурмагаар тэгшилгээ хийх хэрэгтэй.

Суурийн хаяаг 30см гүнтэй ухна. Гадаргуу дээрээ шороо, тоос, шохой, будгийн үлдэгдэл байвал сайтар цэвэрлэнэ.

Дараа нь  ус чийгний хамгаалалтыг битүү жигд түрхэж зөөлөн резин давхарга үүсгэнэ.

Дулаалгын ХPS хавтан дээр цавуут зуурмаг түрхэж суурин дээр наагаад 24 цаг байлгаж хатаасны дараа хадаасаар бэхлэнэ.

Cуурийн ил гарсан хэсэгт ус чийгт тэсвэртэй, механик гэмтлээс хамгаалах зориулалттай өнгөлгөөний материал хийх нь тохиромжтой.

Хэрэв боломжтой бол бетон хаяавч цутгах хэрэгтэй.